Ushairi

Mapenzi yamejaa upungufu.

Mapenzi sio kipofu, yana mato siku hizi
Yanachagua minofu, hayavutwi kwa hirizi
Yamejivisha jokofu, la usaliti na wizi
Yamejaa upungufu, hayana tena mjuzi

Mapenzi bila sarafu, kama wali uso nazi
Itakuingia hofu, umegewe waziwazi
Upewe hadithi ndefu, uambe ni kikohozi
Yamejaa upungufu, hayana tena mjuzi

Mababe leo magofu, hawaimbi ni miluzi
Wamekuwa kama wafu, si wa leo si wa juzi
Wamevaa nguo chafu, sera katu hawauzi
Yamejaa upungufu, hayana tena mjuzi

Walibwagwa chini tifu, walioyapiga mbizi
Wakapata maumbufu, kuyafua kumbe nazi
Wakatamani barafu, wayapoze mauguzi
Yamejaa upungufu, hayana tena mjuzi

Wasemao wazoefu, wale wenye mazoezi
Walichomeka mapafu, magumu wakamaizi
Walishindwa kuwakifu, wale wao wapumbazi
Yamejaa upungufu, hayana tena mjuzi

Huwavutia harufu, wakazitafuta ngazi
Ila wakijayashufu, yamejaa mazigazi
Wangavaliwa mikufu, bora wawe wafagizi
Yamejaa upungufu, hayana tena mjuzi

Walokuwa wakunjufu, walitolewa machozi
Wakaacha kuyasifu, akina mandanda kozi
Wakarudi kwa Raufu, wakajuwa hawawezi
Yamejaa upungufu, hayana tena mjuzi

Kamwe sitoyakashifu, wapendana hata mbuzi
Nayaweka kwenye safu, vijiandae vizazi
Hakuna uaminifu, yalobaki utelezi
Yamejaa upungufu, hayana tena mjuzi.

(Malenga ni Daniel Wambua)

Show More

Related Articles

Leave a Reply

Your email address will not be published. Required fields are marked *

Check Also

Close
Back to top button
Close
Close